Vlora Kozhani: Profil gruaje

Profil gruaje

Shoh: Një pjesë tënde,

Profil hëne

Një sy si shigjetë,

E drejtuar, ku ta di se ku,

Mistik, aq hutues, por me kujdes.

Në të rrallë ndonjë rrahje qerpiku,

Që të jep të kuptosh shumë,

Por, kuptim s’gjen askund.

Shoh: Një pjesë tënden,

Një vetull e radhitur mirë,

E krehur si me kujdes,

Domëthënëse për një qëllim.

Shoh: Hundën tënde,

Në qendër të sates fytyrë,

E kthyer në profil,

Si treguese e të padukshmes,

Qëndrim tundues.

Shoh: Një pjesë gjysmake të buzëve tua,

E pamjaftueshme,

Pjesën tjetër veç e imagjinoj,

Brenda tyre mbetën fjalë të pathëna,

Apo veç më bëjnë të dyshoj kot?

Profil gruaje,

Profil hëne,

E çuditshme,

Aq tërheqëse,

S’do të të njoh kurrë dhe pjesën tjetër,

E të mbetëm me këtë që shoh,

S’mjafton.

Vlora Kozhani